|
فاتك قطار العمر والشيب طالك واللي يفوته القطر واعزتيله
هذي ثمار العمر جت في سلالك ما عاد لك في قطف الثمر من حصيله
قوطر ربيع العمر والصيف جالك واللي نوى المصياف قرّب رحيله
واللي بلغ ستين لا شك هالك ما من قضى الرحمن منجى ووسيله
أما يقل للموت طوّلت بالك والا يجي خبط المقادير غيله
والآدمي ما بين ذلك وذلك إما خطى برجليه والا تجيله
ويا غصن يللي وارفن في ظلالك صيور هبّات الذواري تشيله
ومالك تقسم ورث ما عاد مالك جاته أيادي من زمن تحتري له
لا المال مالك أو حلالك حلالك قمح الصليبه جاه من هو يكيله
ابراهيم مسلم
|
